Ekipi i Auditimit Social në Komunën e Lipjanit gjatë muajit shtator dhe tetor,  ka monitoruar implementimin e projekteve të publike të financuara nga Granti i Performancës Komunale, duke përfshirë rrugët, infrastrukturën publike dhe objektet me rëndësi kulturore e historike.

Ekipi i Auditimit Social është një grup i qytetarëve që monitoron katër projekte në Lipjan: “Rikonstruktimi i rrugës Ajet Kozhani Poturofc dhe Ribar i Madh”, “Rikonstruktimi i rrugës Dobrotin – Sllovi”, “Ndërtimi i shtëpisë muze të veteraneve të UÇK-së, Krojmir” dhe “Muri Gabion në fshatin Gadime e Ulët (te shpella)”.

Pas vizitave në terren, takimeve me menaxherët e kontratave dhe diskutimeve me qytetarët, ekipi ka dorëzuar rekomandimet e tij për përmirësimin e cilësisë së projekteve dhe rritjen e transparencës në zbatimin e tyre.

Gjatë vizitave, qytetarët dhe anëtarët e ekipit identifikuan disa çështje që kërkojnë vëmendje nga ekzekutivi i komunës. Në projektin “Rikonstruimi i rrugës Ajet Kozhani në Poturofc dhe Ribar i Madh”, u theksua mungesa e trotuareve dhe ndriçimit publik, si dhe platformave të shpejtësisë që nuk përputhen me standardet. Në projektin e “Rikonstruktimit të rrugës Dobrotin-Sllovi” u vlerësua lartë puna e kryer, por u theksua mungesa e koshave të mbeturinave dhe trotuareve të përshtatshme për persona me nevoja të veçanta.

Në projektin “Ndërtimi i Muzeut të Shtëpisë së Veteranëve të UÇK-së në Krojmir”, ekipi evidentoi mungesën e masave të sigurisë në kantier dhe nevojën për disa ndryshime të brendshme, që do të ndikonin pozitivisht në funksionalitetin e këtij muzeu nga komuniteti. Ndërkaq, në projektin “Ndërtimi i Murit Gabion, Parkingut dhe Stacionit të Autobusëve në Gadime të Ulët”, ekipi vërejti në terren se punimet nuk kishin filluar për shkak të mungesës së lejes mjedisore, pasi zona është e mbrojtur.

Pas analizës së gjetjeve, Ekipi i Auditimit Social përgatiti dhe dorëzoi një set të rekomandimeve për komunën dhe drejtoritë përkatëse, duke përfshirë: përfshirjen e hershme të qytetarëve në fazën e dizajnimit të projekteve, promovimin e buxhetimit me pjesëmarrje, rritjen e përfshirjes së grave në proceset vendimmarrëse, si dhe sigurimin e ndriçimit publik, trotuareve dhe barrierave mbrojtëse për sigurinë e qytetarëve. Poashtu, sa i përket projektit të Murit Gabion, ekipi ka marrë përgjigje nga MMPHI për mungesën e lejes mjedisore. Në këtë drejtim, ekipi ka dorëzuar edhe një rekomandim emergjent te komuna që të zgjatet plani dinamik i projektit dhe të fillojnë punimet sa më shpejt që të jetë e mundur, me qëllim që të mos vonohen më tej zbatimi dhe funksionalizimi i plotë i projektit.

Ekipi për fund theksoi rëndësinë e konsultimit të vazhdueshëm me komunitetin gjatë gjithë ciklit të projekteve, për të siguruar transparencë, cilësi dhe ndikim të qëndrueshëm në jetën e qytetarëve të Lipjanit.

Në vitin 2025, BIRN Kosova dhe Democracy Plus (D+) janë angazhuar nga Projekti për Decentralizimin dhe Përkrahjen e Komunave (DEMOS) për të bërë lehtësimin/fasilitimin e procesit të Auditimit Social në 16 projekte të përzgjedhura në Kaçanik, Istog, Drenas, Dragash, Lipjan dhe Mamushë. Projektet që do të monitorohen janë përfituar nga komunat përkatëse përmes Grantit të Performancës Komunale.

Cikli i Auditimit Social i vitit 2025 ka filluar në gusht 2025 dhe do të përfundojë në dhjetor 2025.