Në Komunën e Lipjanit u mbajt trajnimi i parë me ekipin e Auditimit Social, i organizuar nga Democracy Plus (D+) në bashkëpunim me organizatën lokale YAHR. Ky trajnim shënon fillimin e një procesi të rëndësishëm që synon të përfshijë qytetarët në mënyrë aktive në monitorimin e projekteve komunale dhe të forcojë transparencën dhe llogaridhënien në nivel lokal.

Pjesëmarrësit në trajnim përfshinë një përbërje të larmishme akterësh lokalë – kryetarë dhe anëtarë të këshillave lokale, gazetarë, përfaqësues të shoqërisë civile si dhe qytetarë të tjerë të interesuar, të cilët preken drejtpërdrejt nga projektet që do të monitorohen. Ky përfaqësim i gjerë kontribuoi në krijimin e një atmosfere bashkëpunuese dhe gjithëpërfshirëse gjatë diskutimeve dhe ushtrimeve praktike.

Trajnimi u fokusua në hapat kryesorë të procesit të auditimit social, duke filluar nga koncepti dhe përgatitja e ekipeve, përdorimi i terminologjisë përkatëse, si dhe roli i qytetarëve në monitorimin e shërbimeve publike. Gjithashtu, u zhvilluan ushtrime konkrete mbi qasjen në dokumente publike, formulimin e pyetjeve dhe indikatorëve të monitorimit, si dhe hartimin e planeve të punës për periudhën në vijim.

Kjo nismë është pjesë e Projektit DEMOS – bashkëfinancuar nga Bashkimi Evropian, Qeveria e Zvicrës dhe Qeveria e Suedisë, dhe e implementuar nga Helvetas – si pjesë e një përpjekjeje të vazhdueshme për të fuqizuar qytetarët dhe për të promovuar transparencën dhe llogaridhënien në qeverisjen lokale.

Ky trajnim përbën vetëm hapin e parë të një procesi më të gjatë, përmes të cilit qytetarët e Lipjanit do të kenë mundësinë të ndjekin nga afër zbatimin e projekteve publike dhe të kontribuojnë me vërejtjet dhe rekomandimet e tyre. Përmes këtij mekanizmi, synohet jo vetëm rritja e transparencës institucionale, por edhe ndërtimi i besimit të ndërsjellë mes komunës dhe komunitetit.