Ekipi i Auditimit Social në Komunën e Mamushës gjatë muajit shtator dhe tetor ka monitoruar zbatimin e projektit për furnizimin e institucioneve publike me gjeneratorë dhe pajisje pastrimi, projekt ky i përfituar nga Granti i Performancës Komunale. Ekipi ka theksuar vazhdimisht rëndësinë që komuniteti dhe institucionet përkatëse t’i adresojnë nevojat e shkollave, Qendrës Kryesore të Mjekësisë Familjare dhe zyrave komunale, në mënyrë që këto institucione të mund të vazhdojnë punën pa pengesa edhe gjatë ndërprerjeve të energjisë elektrike.

Ekipi i Auditimit Social, i përbërë nga qytetarë të angazhuar aktivisht, organizoi vizita në terren dhe takime me menaxherët e kontratave për të diskutuar përparimin e projektit, sfidat teknike dhe rëndësinë e shpërndarjes së drejtë të pajisjeve. Gjatë takimeve, qytetarët theksuan rëndësinë e përdorimit të gjeneratorëve për pajisjet kritike si frigoriferët mjekësorë, serverët IT dhe laboratorët, si dhe të pajisjeve elektrike për pastrim, për të përmirësuar higjienën dhe mirëmbajtjen e ambienteve publike.

Pas analizës së gjetjeve dhe diskutimeve me ekipin, u hartuan rekomandime për komunën, duke përfshirë: shpërndarjen e drejtë të pajisjeve, mirëmbajtjen e rregullt të gjeneratorëve dhe pajisjeve të pastrimit, përfshirjen e qytetarëve në monitorimin e funksionalitetit të tyre dhe ruajtjen e fleksibilitetit në specifikimet teknike për të parandaluar anulime të tjera të mundshme të tenderëve. Ekipi gjithashtu vlerësoi rëndësinë e buxhetimit me pjesëmarrje si mjet për rritjen e angazhimit qytetar dhe përfshirjen e grave në vendimmarrje.

Në vitin 2025, BIRN Kosova dhe Democracy Plus (D+) janë angazhuar nga Projekti për Decentralizimin dhe Përkrahjen e Komunave (DEMOS) për të lehtësuar procesin e Auditimit Social në projekte të përzgjedhura në disa komuna, duke përfshirë edhe Mamushën.

Cikli i Auditimit Social i vitit 2025 ka filluar në gusht 2025 dhe do të përfundojë në dhjetor 2025.