Në Suharekë u mbajt punëtoria me temë “Qëndrueshmëria Mjedisore dhe platforma ndreqe.com”, e cila mblodhi një grup të larmishëm pjesëmarrësish, përfshirë përfaqësues të organizatave joqeveritare lokale, ambientalistë, aktivistë të rinj dhe profesorë të gjimnazeve. Qëllimi i këtij aktiviteti ishte të krijohej një hapësirë diskutimi dhe shkëmbimi idesh rreth sfidave mjedisore me të cilat përballet komuniteti lokal, si dhe të identifikohen mënyra konkrete për adresimin e tyre.

Gjatë punëtorisë, pjesëmarrësit diskutuan një sërë çështjesh që lidhen me menaxhimin e mbeturinave, ndotjen e ajrit dhe ujit, mungesën e hapësirave të gjelbra dhe nevojën për mirëmbajtje më të mirë të hapësirave publike. U theksua se këto sfida kërkojnë jo vetëm ndërhyrje institucionale, por edhe angazhim më të madh të qytetarëve, veçanërisht të të rinjve, të cilët luajnë një rol kyç në promovimin e praktikave të qëndrueshme dhe në ngritjen e vetëdijes në komunitet.

Një fokus i veçantë iu kushtua rëndësisë së edukimit, si formal ashtu edhe joformal, në ndërtimin e një kulture mjedisore më të përgjegjshme. Pjesëmarrësit diskutuan për nevojën e integrimit më të madh të temave mjedisore në kurrikulat shkollore, si dhe për fuqizimin e të rinjve përmes aktiviteteve praktike dhe iniciativave komunitare. Në këtë kontekst, u theksua edhe roli i edukimit medial në identifikimin dhe luftimin e dezinformatave që lidhen me çështjet mjedisore, duke ndihmuar qytetarët të marrin vendime të informuara.

Gjatë aktivitetit, pjesëmarrësit patën mundësinë të njihen më nga afër me platformën ndreqe.com, e cila shërben si një mjet praktik për raportimin e problemeve në komunitet. Përmes demonstrimeve konkrete, u prezantua mënyra se si qytetarët mund të raportojnë çështje si deponitë ilegale, ndriçimi publik, apo dëmtimet në infrastrukturë, duke kontribuar kështu drejtpërdrejt në përmirësimin e hapësirave publike dhe rritjen e llogaridhënies institucionale.

Diskutimet nxorën në pah rëndësinë e bashkëpunimit ndërmjet institucioneve, shoqërisë civile dhe qytetarëve për të arritur ndryshime të qëndrueshme dhe afatgjata në mbrojtjen e mjedisit.

Ky aktivitet u organizua në kuadër të projektit “Green Media Literacy for Sustainable Communities”, pjesë e projektit BOOST Balkans, i financuar nga European Association for Local Democracy (ALDA) dhe Agence Française de Développement (AFD).