Demokraci Plus, në kuadër të projektit “Promovimi i Procedurave të Drejta Administrative për Qytetarë dhe Biznese”, i financuar nga Zyra e Bashkimit Evropian në Kosovë, ka organizuar konferencën e parë rajonale “Fuqia e Pjesëmarrjes: Ulja e Barrës Administrative përmes Angazhimit të Qytetarëve dhe Bizneseve në Ballkanin Perëndimor.”

Konferenca është mbajtur në partneritet me Institutin EPIK dhe GIZ Kosovë, në bashkëpunim me Zyrën për Planifikim Strategjik pranë Zyrës së Kryeministrit të Republikës së Kosovës.

Ngjarja mblodhi pjesëmarrës nga institucione publike, organizata të shoqërisë civile dhe përfaqësues të komunitetit të biznesit. Panelistë nga vende të ndryshme të rajonit ndanë përvoja praktike dhe zhvilluan diskutime mbi mënyrat konkrete për përmirësimin e shërbimeve publike dhe thjeshtimin e procedurave administrative për qytetarët dhe bizneset.

Folësit kryesorë – z. Lulezon Jagxhiu, z. Christian Böttcher dhe znj. Laura Fallavollita – theksuan rëndësinë e përfshirjes së qytetarëve në hartimin e politikave publike, rolin e transformimit dixhital dhe nevojën për përdorim të teknologjisë në shërbim të transparencës dhe efikasitetit të administratës.

Programi i konferencës përfshiu katër panele kryesore, ku u trajtuan tema si: mbikëqyrja qytetare mbi reformat, bashkëpunimi rajonal, përfshirja e grupeve të cenueshme dhe ndikimi i dixhitalizimit në zhvillimin ekonomik.

Përmes kësaj konference u riafirmua përkushtimi për ndërtimin e një administrate publike të orientuar drejt qytetarëve dhe bizneseve, si dhe rëndësia e bashkëpunimit ndërsektorial për një qeverisje më të drejtë, gjithëpërfshirëse dhe efikase në të gjithë Ballkanin Perëndimor.