Demokraci Plus (D+) ka organizuar më 24–25 prill 2026 në Istog një trajnim dyditor për monitorimin e prokurimit publik, me pjesëmarrjen e rreth 20 studentëve të gazetarisë.

Qëllimi i këtij trajnimi ishte ofrimi i njohurive bazë dhe praktike mbi prokurimin publik, si dhe zhvillimi i aftësive për analizimin e procedurave dhe identifikimin e rreziqeve në këtë fushë.

Gjatë trajnimit, pjesëmarrësit u njohën me konceptet kryesore të prokurimit publik, përfshirë parimet, fazat e procedurave dhe mënyrën se si shpenzohen fondet publike përmes kontratave publike.

Programi përfshiu analizën e dokumenteve tenderuese dhe përdorimin e platformës së prokurimit elektronik, përmes së cilës mundësohet qasja në të dhëna si njoftimet për kontratë, dosjet e tenderit dhe vendimet e autoriteteve kontraktuese.

Në këtë drejtim, pjesëmarrësit u angazhuan në identifikimin e indikatorëve të rrezikut (“flamujve të kuq”), si mungesa e konkurrencës, përdorimi i procedurave jo-transparente apo kriteret e dyshimta të vlerësimit.

Po ashtu, gjatë trajnimit u trajtuan edhe Marrëveshjet për Shërbime të Veçanta (MShV), si një kategori e veçantë e kontraktimit publik, duke adresuar qëllimin e tyre ligjor dhe sfidat në praktikë, përfshirë përdorimin e tyre për mbulimin e funksioneve të rregullta administrative.

Trajnimi përfshiu edhe perspektivën e gazetarisë hulumtuese në trajtimin e prokurimit publik, me fokus në qasjen ndaj dokumenteve publike, identifikimin e çështjeve problematike dhe ndërlidhjen e tyre me interesin publik.

Në kuadër të aktivitetit u realizuan edhe ushtrime praktike, ku pjesëmarrësit analizuan raste konkrete dhe identifikuan elemente me potencial për raportim.

Ky trajnim u realizua me mbështetjen e Bashkimit Evropian, në kuadër të projektit “Rritja e transparencës, llogaridhënies dhe efiçiencës në shpenzimin e parasë publike përmes prokurimit publik në Kosovë”.