Është publikuar raporti përfundimtar i Auditimit Social në Komunën e Mamushës për projektin “Gjeneratorë dhe pajisje elektrike për pastrimin e dyshemeve për objektet komunale”, një investim me vlerë 52,333.66 euro, i financuar përmes Grantit të Performancës Komunale. Ky është projekti i parë i monitoruar në Mamushë përmes metodologjisë së Auditimit Social, proces i cili u lehtësua nga Demokraci Plus (D+) dhe shoqata lokale Mamuşa Emekçi Kadınlar Derneği, me mbështetjen e programit DEMOS.

Gjatë tri muajve të angazhimit, ekipi i përbërë nga mbi 15 qytetarë të Mamushës analizoi dokumentet e prokurimit, zhvilloi vizita në terren, mbajti takime me komunën dhe konsultoi akterët përfitues – administratën, institucionet arsimore dhe QKMF-në. Raporti përmbledh gjetjet kryesore për rëndësinë e projektit, sfidat në procesin e prokurimit dhe nevojat prioritare të institucioneve për furnizim të qëndrueshëm me energji elektrike dhe kushte adekuate higjienike.

Sipas raportit, projekti është vlerësuar si domosdoshmëri për komunën më të vogël në Kosovë, e cila përballët me ndërprerje të shpeshta të energjisë dhe me mungesë pajisjesh moderne për pastrimin e hapësirave publike. Institucionet, veçanërisht shkollat dhe QKMF-ja, kanë theksuar se ndërprerjet e rrymës ndikojnë drejtpërdrejt në procesin mësimor, përdorimin e pajisjeve digjitale dhe funksionimin e shërbimeve shëndetësore. Po ashtu, mungesa e pajisjeve elektrike për pastrim ka vështirësuar mirëmbajtjen e dyshemeve në institucione me qarkullim të lartë qytetarësh.

Nga analiza e prokurimit, ekipi ka konstatuar se tenderi i parë është anuluar, pasi ofertat e tre operatorëve ekonomikë nuk kanë përmbushur kërkesat teknike të dokumentacionit, veçanërisht specifikat lidhur me dimensionet e gjeneratorëve. Pas diskutimeve me Zyrën e Prokurimit, autoriteti kontraktues ka rishikuar dosjen e tenderit dhe e ka rishpallur atë me specifika më gjithëpërfshirëse, duke eliminuar kufizimet e panevojshme teknike. Komuna ka shprehur gatishmërinë që ekipi i Auditimit Social të jetë i pranishëm në pranimin teknik të pajisjeve, një praktikë e vlerësuar nga ekipi si hap pozitiv drejt rritjes së transparencës dhe llogaridhënies.

Raporti evidenton edhe realitetin e pjesëmarrjes qytetare në Mamushë. Edhe pse komuna ka ndërmarrë të gjitha hapat formalë për organizimin e dëgjimeve publike gjatë vitit 2025, asnjë qytetar nuk ka marrë pjesë në konsultimet buxhetore. Në këtë drejtim, raporti nënvizon nevojën për forma më të përshtatshme të angazhimit qytetar dhe për promovimin e buxhetimit me pjesëmarrje si mjet i integrimit të drejtpërdrejtë të komunitetit në vendimmarrje.

Publikimi i raportit të Auditimit Social në Mamushë shënon një hap të rëndësishëm drejt forcimit të transparencës, llogaridhënies dhe përfshirjes qytetare në qeverisjen lokale. Ky proces është vlerësuar nga Komuna e Mamushës si një mundësi e re për bashkëpunim me komunitetin, si dhe një praktikë që pritet të vazhdojë në projektet e ardhshme.

Për të lexuar raportin e plotë me të gjitha gjetjet dhe rekomandimet klikoni këtu.

DEMOS është projekt i cili bashkëfinancohet nga BE-ja, Qeveria zvicerane dhe Qeveria suedeze, dhe zbatohet nga HELVETAS Swiss Intercooperation-Kosovo. Ky projekt mbështet komunat e Kosovës në arritjen e qeverisjes lokale më demokratike dhe menaxhimit më të mirë komunal. Projekti DEMOS gjithashtu mbështet Qeverinë e Kosovës në zhvillimin e politikave, të cilat janë më të favorshme për financim të bazuar në rregulla për komunat.

Auditimi Social përkrahet nga Ministria e Administrimit të Pushtetit Lokal (MAPL) dhe Projekti për Decentralizim dhe Përkrahje të Komunave (DEMOS).

Në vitin 2025, BIRN Kosova dhe Democracy Plus (D+) janë angazhuar nga Projekti për Decentralizimin dhe Përkrahjen e Komunave (DEMOS) për të bërë lehtësimin/fasilitimin e procesit të Auditimit Social në 16 projekte të përzgjedhura në Kaçanik, Istog, Drenas, Dragash, Lipjan dhe Mamushë. Projektet që do të monitorohen janë përfituar nga komunat përkatëse përmes Grantit të Performancës Komunale.