Demokraci Plus (D+) kërkon nga Ministria e Mjedisit dhe Planifikimit Hapësinor (MMPH) të anulojë aktivitetin e prokurimit “Konsulentë Ligjorë për mbështetjen e hartimit të legjislacionit dytësor për Ligjin e Banimit Social dhe të Përballueshëm“, me numër të prokurimit 210-25-7817-3-2-2 dhe vlerë të parashikuar 50,000.00 euro. 

Ky aktivitet është iniciuar në kundërshtim me rregullat për kontraktimin e shërbimeve të veçanta, respektivisht nenin 57.2 të Rregullorës nr. 002/2024 për Prokurim Publik, në të cilën parashikohet që konsulentët mund të kontraktohen vetëm për shërbime që nuk mund të sigurohen përmes procedurave të rekrutimit sipas Ligjit për Zyrtarët Publik (LZP).   

Për më tepër, ky veprim bie ndesh edhe me praktikat institucionale të hartimit të ligjeve dhe akteve nënligjore në Kosovë, pasi MMPH synon kontraktimin e një operatori ekonomik për të hartuar legjislacionin dytësor të paraparë me Ligjin për Banimin Social dhe të Përballueshëm. Hartimi i ligjeve dhe akteve nënligjore është përgjegjësi e vetë ministrisë, sipas Rregullores (QRK) nr. 17/2024 e Punës së Qeverisë së Republikës së Kosovës, përkatësisht Nënkapitullit II mbi rregullat dhe procedurat e veçanta për hartimin e legjislacionit. Për më shumë, në bazë të evidencës së ligjeve publikuar nga Kuvendi i Kosovës, Ligji për Banimin Social dhe të Përballueshëm është miratuar më 05.12.2024 mirëpo ende nuk është shpalluar nga Presidentja e Kosovës dhe rrjedhimisht nuk është publikuar nga Gazetën Zyrtare e as nuk është në fuqi.  

Vlen të theksohet se gjatë vitit 2025, MMPH ka angazhuar edhe nëntë ekspertë të jashtëm të fushave të ndryshme, përfshirë edhe jurist për departamentin e Banimit Social dhe të Përballueshëm. Andaj, kontraktimi i konsulentëve ligjorë shtesë për hartim të akteve nënligjore, përveç që është i kundërligjshëm, është kosto shtesë për autoritetin kontraktues. 

Në këtë kontekst, hartimi i akteve nënligjore jashtë institucionit cenon përgjegjësinë ligjore dhe institucionale të ministrisë, rrezikon integritetin e procesit të hartimit të ligjeve dhe krijon precedent të dëmshëm për përdorimin e shërbimeve të jashtme në procese ku kompetenca dhe përgjegjësia janë brenda institucioneve publike. 

Për këtë arsye, D+ konsideron të domosdoshëm anulimin e këtij aktiviteti të prokurimit nga MMPH, në mënyrë që të garantohet integriteti dhe përputhshmëria me Rregullorën e punës së Qeverisë për hartimin e legjislacionit. 

Deklaratë mohuese: 

Ky reagim është publikuar me mbështetje financiare të Bashkimit Evropian dhe SMART Balkans. Përmbajtja e këtij reagimi është përgjegjësi e vetme e Demokraci Plus (D+) dhe në asnjë mënyrë nuk mund të paraqes pikëpamjet e Bashkimit Evropian dhe SMART Balkans. Projekti “Rritja e transparencës, llogaridhënies dhe efiçiencës në shpenzimin e parasë publike përmes prokurimit publik në Kosovë” i financuar nga BE dhe SMART Balkans, zbatohet nga Demokraci Plus (D+).