Demokraci Plus (D+), gjatë procesit të monitorimit të transparencës dhe rregullsisë në procedurat e prokurimit publik ka evidentuar se Ministria e Ekonomisë (ME), ka shpërblyer me kontratë përmes marrëveshjeve për shërbime të veçanta ish-udhëheqësin e zyrës së prokurimit në këtë ministri, 76 ditë pas pensionimit. 

Kontraktimi i ish-udhëheqësit të zyrës së prokurimit në ME, përbën shkelje të dispozitave ligjore që i referohen prokurimit publik: Ligjit për Prokurim Publik dhe Rregullores për Prokurim Publik. Sipas Rregullores nr. 002/2024 për Prokurim Publik, në nenin 57.2, konsulentët mund të kontraktohen vetëm për shërbime që nuk mund të sigurohen përmes procedurave të rekrutimit sipas Ligjit për Zyrtarët Publik.  

Për më tepër, ky kontraktim përbën shkelje të Ligjit nr. 06/L-011 për Parandalimin e Konfliktit të Interesit në Ushtrimin e Funksionit Publik, sepse sipas nenit 18, një zyrtar i lartë nuk mund të përfshihet në aktivitete kontraktuale pa kaluar dy vite, pas përfundimit të funksionit publik. Përkundër kësaj, i kontraktuari vetëm shtatëdhjetë e gjashtë ditë pas pensionimit ka nënshkruar kontratën me ME. 

Pavarësisht kërkesës së D+ për anulimin e kësaj procedure para se ajo të nënshkruhej, sepse kriteret e përdorura janë kufizuese, favorizuese, diskriminuese dhe bien ndesh me parimet e prokurimit publik, ME nuk e ka përfillur këtë kërkesë duke vazhduar me kontraktimin në fjalë. 

Andaj, në funksion të forcimit të integritetit në prokurim publik dhe parandalimin e konfliktit të interesit në ushtrimin e funksionit publik, D+ i bën thirrje ME-së që të anulojë kontratën e dhënë (nr. Prot. 1599 e datës 01.04.2025) dhe të respektojë normat ligjore për të garantuar konkurrencë të ndershme dhe llogaridhënëse. Po ashtu, D+ fton ME që të respektojë opinionin ligjor me referencë AKK-DPKI-06-1457/22, të datës 01.07.2022, të Agjencisë për Parandalimin e Korrupsionit, i cili trajton një rast të ngjashëm dhe përcakton qartë standardet ligjore që duhet të ndiqen në këto raste.