Të rinjtë në pesë komuna të Kosovës angazhohen për një mjedis më të qëndrueshëm
Democracy Plus (D+) deri më tani ka organizuar 15 sesione informuese me të rinj në pesë komuna të Kosovës: Istog, Kamenicë, Mitrovicë e Jugut, Suharekë dhe Fushë Kosovë. Këto aktivitete mblodhën gjithsej 384 të rinj, prej të cilëve 225 vajza dhe 159 djem, duke krijuar hapësira diskutimi dhe mësimi rreth çështjeve mjedisore dhe rolit të edukimit medial.
Gjatë sesioneve, pjesëmarrësit u njohën me tema kyçe që lidhen me mbrojtjen e mjedisit, mënyrat e jetesës së qëndrueshme, menaxhimin e mbeturinave dhe ndikimin e dezinformatave në perceptimet publike për çështjet mjedisore. Përmes diskutimeve interaktive dhe shembujve praktikë, të rinjtë u inkurajuan të reflektojnë mbi rolin e tyre si qytetarë të informuar dhe aktivë në promovimin e praktikave të qëndrueshme në komunitetet e tyre.
Një fokus i veçantë iu kushtua zhvillimit të aftësive për të identifikuar dhe analizuar informacionin në lidhje me çështjet mjedisore, duke theksuar rëndësinë e edukimit medial në luftimin e dezinformatave. Të rinjtë shfaqën interes të lartë për temat e trajtuara, duke u angazhuar aktivisht në diskutime dhe duke ndarë përvojat dhe shqetësimet e tyre lidhur me sfidat mjedisore në nivel lokal.
Një komponent interaktiv i sesioneve ishte edhe loja edukative “Testo detektorin e së vërtetës”, përmes së cilës pjesëmarrësit patën mundësinë të testojnë aftësitë e tyre në identifikimin e informatave të sakta dhe atyre të rreme, veçanërisht në kontekstin e çështjeve mjedisore. Luaj lojën edhe ti: https://edukimimedial.dplus.org/sq/env-game-intro
Këto aktivitete synuan jo vetëm rritjen e njohurive, por edhe fuqizimin e të rinjve për të ndërmarrë veprime konkrete në komunitetet e tyre, përmes shpërndarjes së informacionit të saktë, përfshirjes në iniciativa lokale dhe promovimit të sjelljeve më të përgjegjshme ndaj mjedisit.
📌Këto aktivitete u organizuan në kuadër të projektit “Green Media Literacy for Sustainable Communities”, pjesë e projektit BOOST Balkans, i financuar nga European Association for Local Democracy (ALDA) dhe Agence Française de Développement (AFD).