Tenderin për furnizim me maska dhe dezinfektues, edhe pse e kishte anuluar dy here, Komuna e Vitisë e dha me procedure të negocimit. Tenderin ia kishte dhënë kompanisë Krasniqi Sh.P.K, e cila nuk ka qenë fare ofertuese në dy shpalljet e para. Komuna e Vitisë nuk ka asnjë informacion se si i është dhënë tenderi kësaj kompanie, përveç njoftimit për nënshkrimin e kontratës.

Beadin Syla

Në tetor të vitit të kaluar, Komuna e Vitisë po kërkonte furnizim me maska dhe dezinfektues për parandalimin e pandemisë Covid-19. Për t’i siguruar ato, zyra e prokurimit e kësaj komune, me 20 tetor 2020, kishte hapur tender për furnizim me këto produkte.

Mirëpo, në këtë tender të hapur, nuk kishte ofertuar asnjë operator ekonomik, gjë që e kishte detyruar komisionin vlerësues që të rekomandojë anulimin e tij.

Komuna ka pasur të njëjtat kritere në shpalljen e parë dhe të dytë të tenderit për furnizim me maska dhe dezinfektues. Sikurse herën e parë, edhe në shpalljen e dytë, komuna e ka anuluar tenderin për furnizim me maska dhe dezinfektues. Anulimi për herë të dytë i këtij tenderi, kishte shtyrë zyrën e prokurimit që të niste procedurat për dhënien e tenderit me procedurë të negocimit. Me shpejtësi, komuna kishte ftuar vetëm një operator ekonomik, Krasniqi Shp.P.K, për ta negociuar tenderin, ku edhe kishte nënshkruar kontratë me këtë operator. Mirëpo, tek njoftimi për dhënien e të njëjtit tender me negocim, komuna e Vitisë nuk e ka publikuar fare dosjen e tenderit në E-Prokurimi.

Aty nuk gjenden as kontrata mes komunës dhe operatorit ekonomik Krasniqi Sh.P.K, nuk gjenden  kriteret që janë përdorur për dhënien e këtij tenderi, dhe as çmimet që janë paguar për një pako me maska tri shtresore dhe një dezinfektues 500 mililitër.

Tek shpallja e parë e tenderit dhe shpallja e dytë, Komuna e Vitisë tek kriteret për operatorët ekonomik kishte kërkuar certifikata internacionale për kualitet, certifikatë të analizave për pajisjet, certifikatat ISO 14001 2015, 9001 2015, OHSAS 18001 2007. Po ashtu, komuna kishte kërkuar edhe numrin e punëtorëve prej 10 personave që duhet të ketë kompania dhe vlerësimin e rriskut sa i përket sigurisë dhe shëndetit në punë për të gjitha 10 pozitat nga një kompani e licencuar nga Ministria e Punës dhe Mirëqenies Sociale. Po ashtu, Komuna e Vitisë kishte kërkuar edhe disa certifikata tjera, si atë të biznesit, TVSh-së e tjera.

Mirëpo, njohësi i prokurimit publik Isuf Zejna, ka vlerësuar se kriterët e vendosura nga komuna e Vitisë kanë qenë shumë të larta dhe krejt të paarsyeshme në disa pika.

Sipas Zejnës, “një kontratë e tillë e furnizimit, kërkimi i numrit të punëtoreve është i panevojshëm, për shkak se krejt çka i duhet komunës është liferimi i produkteve dhe kjo mund të bëhet me një punëtor po të ishte e nevojshme. Në anën tjetër, janë kërkuar edhe shumë certifikata ISO, dhe shtrohet pyetja se për çfarë i duhen këto certifikata komunës dhe çfarë sigurie i ofrojnë se produktet do të kenë cilësi më të mirë sesa ato të cilat nuk e kanë këtë standard? Një standard tjetër që është kërkuar është OHSAS 18001. Ky standard nuk ekziston më tutje dhe është zëvendësuar me ISO standard 45001, që tregon se komuna nuk ka njohuri në hartimin e këtyre specifikacioneve teknike”, ka thënë Zejna.

Edhe vlerësimi i riskut të pozitave të punës, sipas Zejnës është krejtësisht i panevojshëm, pasi kompania nuk merret me prodhim.

“I njëjti parim vlen edhe për vlerësimin e riskut të pozitave të punës. Kjo kërkesë do të ishte e arsyeshme nëse kompania merret me prodhim apo përpunim dhe vendet e punës përfshijnë detyra të cilat mund të jenë me rrezik, mirëpo në rastin konkret është krejt e paarsyeshme dhe e panevojshme të kërkohet një vlerësim i tillë”, ka theksuar Zejna.

Menjëherë pas anulimit të shpalljes tenderuese në herën e parë, Komuna e Vitisë kishte shpallur njoftim të ri për dhënie të tenderit për furnizim me maska dhe dezinfektues, me vlerën e njëjtë monetare, ku parashiheshin 62 mijë e 700 euro.

Në këtë proces tenderues, Komuna e Vitisë kishte pranuar tri oferta. Në garë për ta fituar këtë tender ishin “Bodrumi i Vjetër” Sh.P.K, “Grupi operatorëve” Samire Osmani B.I, H.Seferi Sh.P.K dhe Grupi operatorëve ekonomik N.T Agimi-De dhe N.Sh.T. Made-Kos.

Pas shqyrtimit të ofertave nga komisioni përkatës, Komuna e Vitisë, me 20.11.2020, e kishte shpallur fitues të tenderit, grupin e operatorëve ekonomik N.T Agimi-De dhe N.Sh.T. Made-Kos. Ata kishin ofertuar për të kryer këtë furnizim me vlerë prej 55 mijë e 376 euro.

Mirëpo, vetëm pesë ditë më vonë, pas ankesës që kishte bërë njëri nga operatorët ekonomik që ishte në garë, (emri i të cilit nuk është bërë i ditur nga Komuna), komisioni vlerësues i formuar nga Komuna e Vitisë kishte kërkuar anulimin e këtij tenderi dhe shpalljen e të gjithë operatorëve ekonomik, si të papërgjegjshëm.

Arsyetimet e komunës

Komuna e Vitisë tregon pse anuluan dy herë tenderin për furnizim me maska dhe dezinfektues, edhe pse në herën e dytë kishte shpallur një fitues.

“Për herën e parë të shpallur me datën 02.11.2020, kemi pasur ankesë dhe sipas ankesës kemi bërë pezullimin e aktivitetit, deri në shqyrtimin e ankesës, ku kemi vazhduar aktivitetin dhe e kemi dërguar në platformë aty nuk është vazhduar fare, dhe është dashur të anulohet procedura. Arsyetimi në anulim: “Nuk kemi pranuar asnjë ofertë, mbasi kemi bërë korrigjimin e kritereve dhe kemi bërë vazhdimin e afatit të dorëzimit, çka në sistemin e E-prokurimit, nuk është vazhdimi”, theksohet në përgjigjen e Zyrës së Prokurimit të Komunës së Vitisë.

Mirëpo, kjo zyrë nuk ka shpjeguar se cilat ndryshime janë bërë. Në kërkesën për të sqaruar se cilat janë ndryshimet e bëra, Zyra për Informim e Komunës së Vitisë ka thënë se nuk mund të japin asnjë përgjigje, pasi zyrtari i prokurimit gjendët në paraburgim. Por, nga ajo që është publikuar në E-Prokurimi, shihet se kriteret në tender janë të njëjta.

Sikurse në tenderin me procedurë të hapur, ashtu edhe në atë me negocim, komuna kishte kërkuar 557 pako me maska tre shtresore, 8400 copë dezinfektues 0.5 litër, 400 copë dezinfektues për duar në gjendje të lëngët paketim 5 litër, 452 copë pajisje plastike për dezinfektimin e duarve me kapacitet 1000 mililitër, 82 copë dezinfektues me shtypje të këmbës 1000 mililitër, 39 pompa krahu për dezinfektim me kapacitet 16 litra dhe 335 dezinfektues për objekt. Zyra e Prokurimit shpjegon se në herën dytë kanë shpallur një fitues pasi kishin marrë tri oferta nga tre operatorë, ku njëri ishte shpallur i papërgjegjshëm, ndërsa tjetri kishte ofertuar me çmim më të lartë.  Mirëpo, Zyra e Prokurimit e Komunës së Vitisë sqaron se pas ankesës së njërit nga operatorët dhe vlerësimit të dokumenteve edhe operatori fitues i tenderit ishte shpallur i papërgjegjshëm.

“Për herën e dytë të shpallur me datën 02.12.2020, kemi pranuar tri oferta, kemi shpallur fitues ofertën e Grupit të Operatorëve Ekonomik, N.T Agimi-De dhe N.Sh.T Made-Kos, ndërsa dy ofertat tjera kanë qenë të papërgjegjshme. Njeri OE ka ushtruar ankesë dhe pas sqarimit dhe kërkimit të dokumenteve për verifikim, edhe OE i rekomanduar për kontratë ka dalur i papërgjegjshëm”, sqaron zyra e Prokurimit.

Zyra e Prokurimit e Komunës së Vitisë nuk është treguar transparent rreth këtij tenderi. Kjo, pasi nuk i ka publikuar në E-Prokurimi shumicën e vendimeve. Në E-Prokurimi, po as në faqen e komunës, nuk janë publikuar ankesa e operatorit ndaj fituesit të tenderit për furnizim me maska dhe dezinfektues N.T Agimi-De dhe N.Sh.T Made-Kos. Mos publikimi i dokumenteve, ngjallë dyshimin se nuk ka pasur ankesë fare. Sipas Zyrës së Prokurimit, Ligji për Prokurim Publik, lejon që t’i jepet ose rekomandohet për dhënie të kontratës vetëm një operatori ekonomik të përgjegjshëm.

Pas dështimit të herës së dytë për të shpallur fitues një operator ekonomik me procedurë të hapur, Komuna e Vitisë kishte vendosur që këtë tenderë ta jepte me procedurë të negocimit, ku edhe vlera e parashikuar ishte zbritur, nga 62 mijë e 700 euro, në 56 mijë.

Kontratën në vlerë prej 55 mijë e 963 euro, apo vetëm 37 euro më pak se sa vlera e parashikuar, e kishte fituar kompania Krasniqi Sh.P.K, me seli në Prishtinë. Zyra e prokurimit tregon pse mori vendim që tenderin ta jap me procedurë të negociuar.

“Për arsye emergjente të kërkesave dhe nevojave të domosdoshme në kohën e pandemisë Covid-19, dhe lidhjes së një kontrate në një kohë optimale në rastin e tretë, kemi qenë të detyruar me procedurën e negociuar, pa publikim të njoftimit për kontratë”, thuhet në përgjigjen e Zyrës së Prokurimit të Vitisë.

Mirëpo, në Komunën e Vitisë nuk kanë ofruar informacione se pse ishte ftuar vetëm një operator ekonomik për të negociuar tenderin për furnizim me maska dhe dezinfektues dhe nëse ishin ulur kriteret për t’ia dhënë kontratën kompanisë Krasniqi Sh.P.K, me arsyetimin se shefi i prokurimit është në paraburgim dhe nuk ka kush të përgjigjet.

“Siç jeni të njoftuar aktualisht Zyra e Prokurimit Publik në Viti, është pa menaxher të prokurimit shkaku i njohur edhe në medie. Me qenë se akoma nuk kemi me shkrim një shkresë se kush do të ushtrojë këtë përgjegjësi nuk kam adresë për ta dërguar pyetjet tuaj tek personi kompetent”, thuhet në një përgjigje të zyrtarit për informim, Mustafë Mehmeti.

Komuna e Vitisë, në mënyrë që të siguronte një proces më transparent dhe të merrte oferta edhe më të lira, do duhej t’i ftonte me shumë se një operator ekonomik për të negociuar tenderin për furnizim me maska dhe dezinfektues.

Thirrja e vetëm një ofertuesi lë hapësirë për dyshime se në këtë tenderë ka pasur keqpërdorime, sepse po të ftoheshin më shumë operatorë për ofertim, do të mund ta jipte tenderin me çmim më të lirë.

Madje, operatori ekonomik Krasniqi Sh.P.K, të cilit i është dhënë tenderi, nuk ka qenë ofertues fare në dy proceset tenderuese me procedurë të hapur që Komuna e Vitisë ka zhvilluar para dhënies së këtij tenderi me procedur të negocimit.

Fakt interesant është që  Komuna e Vitisë nuk i ka ftuar fare operatorët ekonomik të cilët kanë qenë ofertues në dy herët e para. Madje, as konsorciumin që e kishte shpallur fitues të këtij tenderi, operatorët N.T Agimi-De dhe N.Sh.T Made-Kos.

Sa ka paguar komuna e Klinës për një dezinfektues, e sa Komuna e Vitisë?

Komuna e Vitisë për një dezinfektues 500 mililitër ka paguar 2.57 euro. Mirëpo, disa komuna tjera të njëjtin produkt e kanë paguar më lirë. Komuna e Klinës, sipas kontratës së publikuar në E-Prokurimi, ka paguar 2.15 euro për një dezinfektues 500 mililitër. Kjo do të thotë që komuna e Vitisë ka paguar 0.42 euro më shumë për një dezinfektues 500 mililitër. Komuna e Vitisë përmes këtij tenderi ka blerë 8400 copë dezinfektues 0.5 litër me 0.42 cent më shtrenjtë se sa Komuna e Klinës. Nëse shumëzohen 8400 x 0.42, atëherë i bie se Komuna e Vitisë ka paguar 3 mijë e 528 euro më shumë.

Kompania fituese e tenderit të dytë shpjegon si ndodhi anulimi i dhënies së kontratës

Edhe pse ishte shpallur fitues dhe vetëm gjashtë ditë më vonë i ishte anuluar dhënia e tenderit, konzorciumi fitues nuk kishte ushtruar fare ankesë në Organin Shqyrtues të Prokurimit (OSHP).

Sipas vendimit të autoritetit kontraktues, disa certifikata të kualitetit të lartë, sipas disa standardeve, kishin qenë shkak për anulimin e nënshkrimit të kontratës mes Komunës së Vitisë dhe konzorciumit N.T Agimi-De dhe N.Sh.T Made-Kos, për furnizim me maska dhe dezinfektues.

Në një përgjigje nga kompania farmaceutike, Made-Kos, e cila ka qenë pjesë e konsorciumit që ka marrë pjesë në tenderin e Komunës së Vitisë, kanë thënë se pas një ankesë të bërë nga njëra prej kompanive pjesëmarrëse në tender, autoriteti kontraktues, këtë rast Komuna e Vitisë, e ka anuluar tërësisht këtë tender. “Ne jemi shpallur fitues si grup i operatoreve ekonomik, dhe ne kemi qenë vetëm anëtar i konsorciumit dhe jo lider. Gjatë fazës së rivlerësimit, autoriteti kontraktues ka eliminuar grupin tonë si tenderues i eliminuar për arsyet sipas njoftimit mbi vendimin e AK-së të cilin e gjeni në E-prokurim”, thuhet në përgjigjen e kësaj kompanie.

Ky konsorcium kishte ofertuar me çmimin total prej 55 mijë eurove. Por, Made-Kos, nuk ka treguar se sa ka qenë oferta për një pako me maska dhe një dezinfektues, sipas kërkesës nga Komuna e Vitisë, të kërkuar në tender.

Për të parë sa ka qenë çmimi i paguar për një pako me maska tri shtresore dhe një dezinfektues me specifikat që ka kërkuar Komuna e Vitisë, kemi bërë kërkesë me 24 qershor 2021 për qasje në dokumente publike, por nuk është kthyer përgjigje në kërkesën për të parë kontratën e nënshkruar mes Komunës dhe Krasniqi Sh.P.K.

 Beadin Syla është gazetar me 12 vjet përvojë pune në mediat kosovare. Syla ka punuar në mediat e shkruara, fillimisht në Gazetën Lajm, pastaj Infopress, e gazetën Zëri. Në vitin 2013 ka vazhduar në Agjencinë e Lajmeve KosovaPress. Po ashtu, një punë të gjatë ka bërë edhe në mediat online, (portale) si Insajderi e FaktePlus. Ka shkruar gjithmonë për sektorin e politikës, por, pa lënë anash as shkrime për ekonominë, prokurimin, sigurinë e çështje tjera të cilat janë kërkuar nga redaktorët.

 Deklaratë mohimi:

Ky artikull është botuar në kuadër të projektit “Kontribut në gjetjen e shkeljeve në prokurim publik të institucioneve në luftën kundër pandemisë COVID-19” i financuar nga BE, implementuar nga Demokraci Plus (D+). Përmbajtja e këtij shkrimi është përgjegjësi e vetme e autorit dhe në asnjë mënyrë nuk mund të paraqes pikëpamjet e D+ dhe të Bashkimit Evropian.