D+ dhe BIRN publikuan raportin e monitorimit të Administratës Tatimore të Kosovës
Demokraci Plus (D+) dhe Rrjeti Ballkanik i Gazetarisë Hulumtuese (BIRN Kosova), me mbështetje të Ambasades së Britanisë së Madhe në Prishtinë, publikuan raportin e monitorimit të Administratës Tatimore të Kosovës (ATK) për vitin 2019.
Gjatë prezantimit të gjetjeve të raportit, Visar Rushiti nga D+ tha se gjatë këtij viti shkresat e dërguara nga BIRN për përfshirjen e disa zyrtarëve të ATK-së në politikë kanë rezultuar me dorëheqjen e 32 zyrtarëve të ATK-së, qoftë nga politika apo nga ATK-ja.
Zëvendësambasadori i Britanisë së Madhe, Jacob Webber, tha se ekonomia joformale në Kosovë është në nivel të lartë dhe se kjo duhet të trajtohet me prioritet nga ATK-ja. Ai shtoi se Ambasada Britanike do të jetë partner afatgjatë i ATK-së për ruajtjen e stabilitetit makroekonomik dhe luftimit të ekonomisë joformale.
Drejtori i përgjithshëm i ATK-së, Ilir Murtezaj, gjatë publikimit të këtij raporti, deklaroi se Administrata Tatimore e Kosovës ka shënuar progres në gjenerimin e të hyrave. “Për 11 muaj kemi realizim të të hyrave mbi 465 milionë euro apo rreth 44 milionë euro me tepër se vitin e kaluar”, u shpreh ai.
Ndërsa Hekuran Murati nga Lëvizja Vetëvendosje tha se një nga problemet kryesore në ATK është tatimi në të ardhura personale.
Kryeredaktori i KALLXO.com, Kreshnik Gashi, tha se si rezultat i këtij projekti, pas raportimeve në KALLXO.com, është rritur perceptimi qytetar mbi Administratën Tatimore të Kosovës. “Inspektimi i bizneseve që kanë lidhje me politikën, me të kaluarën, ka ndikuar shumë që njerëzit të ndryshojnë perceptimin për ATK-në. Fakti që janë kontrolluar biznese që për vite të tëra nuk janë kontrolluar, ka ndikuar në rritjen e besimit të publikut”, tha Gashi.
Ky është raporti i dytë vjetor për Administratën Tatimore të Kosovës dhe ka për qëllim rritjen e integritetit të ATK-së dhe mbikëqyrjen e këtij institucioni nga shoqëria civile.