Sot Demokraci Plus (D+) ka mbajtur tryezë diskutimi lidhur me draft udhëzimin administrativ të Ministrisë së Shëndetësisë, përmes së cilit do të bëhet rregullimi i çmimeve të produkteve dhe pajisjeve medicinale.

Qëllimi i kësaj tryeze ishte që ky dokument të diskutohet edhe nga shoqëria civile, operatorët ekonomik dhe nga zyrtarë të institucioneve publike, që në fund pastaj ato konstatime të përcillen për ndryshime apo plotësime të të njëjtit.

Në panelin e tryezës së sotme prezent ishte Ministri i Shëndetësisë, Uran Ismaili, Këshilltari i Kosovo Health Project, Arianit Jakupi, Gazetarja hulumtuese e Kohës Ditore, Saranda Ramaj dhe Menaxheri i programit në D+, Isuf Zejna. Po ashtu, pjesë e tryezës ishin edhe deputetë të Kuvendit të Republikës së Kosovës, përfaqësues të kompanive të ndryshme farmaceutike, përfaqësues të shoqërisë civile dhe zyrtarë tjerë të institucioneve publike.

Ministri Ismaili tha se qëllimi i këtij draft udhëzimi administrativ është parandalimi i keqpërdorimit të parasë publike dhe fryrjes së çmimeve për barna dhe pajisje medicinale. Sipas tij, deri tani institucionet publike janë përballur me çmimet më të larta në treg, pasi nuk ka pasur një mekanizëm rregullues. Ismaili tha po ashtu se buxheti është i kufizuar, kështu që ndarja e këtyre mjeteve duhet të bëhet në mënyrë sa më efektive.

Ndërkaq, Këshilltari i Kosovo Health Project, Jakupi tha se ky udhëzim administrativ më nuk do të lejojë çmime sipas dëshirës. Ai tha se qëllim tjetër i këtij udhëzimi është përcaktimi i një çmimi tavan dhe çmimit fiks të barnave dhe pajisjeve medicinale.

Gazetarja Ramaj, po ashtu hulumtuese në Institutin Columbus tha se barnat janë blerë me çmime abuzive, gjë që sipas saj, kjo nuk duhet të diskutohet vetëm nëpër tryeza, por të bëhen hetime nga Prokuroria e Shtetit. Ramaj theksoi se tenderët për barna dhe pajisje medicinale fitohen varësisht se cila parti e ka Ministrinë e Shëndetësisë. Po ashtu, ajo komentoi edhe draft udhëzimin administrativ, ku përfshirjen e çmimit tavan e cilësoi si një nismë të mirë në këtë drejtim.

Ndërkaq, Isuf Zejna nga D+ tha se me këtë udhëzim do të krijohet baza e parë ligjore, e cila do të ndikojë në sektorin privat, ashtu edhe në atë publik. Zejna tha se procesi i përcaktimit të çmimeve duhet të jetë transparent, ku pjesë e komisionit të jenë edhe pjesëtarë të shoqërisë civile, ku jodomosdoshmërisht të kenë të drejtë vote.