Njoftim për konsultim publik për rregullore
Komuna e Vushtrrisë, më saktësisht Drejtoria e Administratës ka vënë në diskutim publik draft-rregulloren për organizimin, funksionimin dhe bashkëpunimin e komunës me fshatra, vendbanime dhe lagjet urbane. Kjo rregullore është hartuar duke u bazuar në Udhëzimin Administrativ (MAPL) nr. 02/2019 për organizimin, funksionimin dhe bashkëpunimin e komunave me fshatrat, vendbanimet dhe lagjet urbane, dhe do ta zëvendësojë rregulloren ekzistuese nr. 03/16.
Në mënyrë që të hartohen dhe miratohen politika sa më të përshtatshme ndaj kërkesave dhe nevoja të qytetarëve, ftohen të gjithë qytetarët e Vushtrrisë që deri me datë 03.04.2022 të dërgojnë komentet, propozimet, sugjerimet dhe vërejtjet e tyre rreth draft-rregullores. Komentet mund të përcjellën në cilëndo nga këto adresa elektronike: [email protected]; [email protected] dhe [email protected]. Draft-rregulloren mund ta gjeni në këtë vegëz: https://dpl.us/Draft-rregullore-Vushtrri, kurse Udhëzimin Administrativ mbi të cilin hartohet rregullorja mund ta gjeni në këtë vegëz: https://dpl.us/UA02/2019.
Pas mbylljes të afatit për dorëzimin e komenteve, grupi punues do të mblidhet të adresojë çështjet e ngritura gjatë procesit të konsultimit publik, dhe dokumenti final do të vazhdojë në Kuvend të Komunës për aprovim. Grupi punues, pjesë e të cilit është edhe Demokraci Plus do të sigurohet që versioni final i rregullores të pasqyrojë kërkesat dhe interesat e qytetarëve të komunës së Vushtrrisë.
Në këtë periudhë do të organizohen edhe takime publike me qytetarë, andaj ftoheni që të ndiqni web-faqen e komunës për njoftim: https://kk.rks-gov.net/vushtrri/.